الأمراض النفسية .العلاج النفسي
الانتحار من منظور نفسي
الانتحار
كتير مننا بيستغرب لما بيسمع خبر واحد انتحر وبيسال نفسة سؤال ربما يكون بديهي
مين مجنون ممكن ينهي حياته لمجرد شوية مشاكل وظروف صعبة بيمر بيها !؟
بس لو هنفكر بمنظور الشخص الي بيفكر في الانتحار
هنلاقي أن الموضوع مش بالسهولة دي
خليني أكدلك بديهيا مفيش حد معندهوش غريزة البقاء
والي بتظهر لا إراديا لما يتعرض الإنسان لاي شيء ممكن يهدد حياته
غريزة البقاء بتظهر في مواقف كتير في حياتنا اليوميه
زي مثلا لو انت سافرت بالطيارة ووقعت في البحر
هتلاقي أن الي بيغرق بتلاقية بيبدا يقب ويغطس ويحرك في جسمه ويحاول يفضل عايش لاكتر فتره ممكنه علشان حد يشوفة وينقذة
وحتى الي بينجو بيفضل على جزيرة نائية
بيفضل يدور على اي اكل او شرب وممكن كمان يأكل حاجات مش بتاكل اصلا
علشان يفضل عايش
حتى لو وصلت أنه يأكل حد منهم علشان الكل يعيش
في افلام كتير اتعملت في قصص مشابهه لكدة واكتر من كدة كمان
لكن لما تيجي تبص على شخص بينتحر
حقك تستغرب وتقول مجنون مين يعمل كدة
خليني انبهك أن المنتحر دة شخص مش طبيعي ومش تفكيرة سليم زي اي حد
في ظروف كتيرة ومشاكل نفسية كبيرة بتخلي البقاء على قيد الحياة في قمه الألم الي مستحيل اي انسان يتحملها
وبتظهر وبشدة في الأمراض النفسية
المكتئب
انت عارف يعني اي الحياة بتاعتك ملهاش اي قيمه أو فائدة
انك تكون ولا شيء وبلا هدف وفوق كل دة مش مستمتع باي حاجه وكل حاجه بتعملها بصعوبة حتى المشي بتمشي وكان في حجر مربوط في رجلك
وانت بتتنفس بتحس انك بتتنفس من ثقب صغير جدا وفي كيس صغير
الاكل كأنك بتاكل حجارة بلا طعم وريحه ولون
ومش بيتبلع ولو اتلبع بيكون زي قطع الزجاج الي بيقطع في المعدة
مش عارف تشتغل وتتعامل مع البشر.
فاشل في كل حاجه حتى الانتحار فاشل فية
يأس ومحبط من كل حاجه وفقدت الطاقة لكل حاجه
فشلت في الدراسة وفي الشغل وفي الجواز وفي العلاقات وفي كل قراراتك
حرفيا كتله فشل بتمشي على الأرض
مش قادر تنام ولو نمت بتخطف كام دقيقة وبترجع تصحي تاني
وتحاول تكمل نوم بتفضل قاعد على السرير بالساعات مفيش نوم
الذكريات الحزينه مش بتفارق افكارك
دة غير جسمك الي بيوجعك بدون سبب طبي
لفيت على كل الدكاتره ومفيش فايدة
علشان كدة لما بيفكر في الانتحار مش من باب الرفاهية
هو عايز يتخلص من كل الألم دة
تفكير المكتئب مش سليم وفي تشويش وكمان عدم المنطقية
ودة الي بيخلينا نفكر هل فعلا مسؤول عن انتحارة ولا دة من ضمن اعراض المرض .
مريض السرطان والالم الي مفيش اي انسان يتحملها على وجهه الأرض مهما كانت قوته وخصوصا لو في المرحله المتأخرة من المرض
بيتألم لدرجه لا تحتمل والوجع والصراخ يخلي اقسي قلب على وجهه الأرض يبكي
هو بيتألم ورغم كدة مفيش فايدة في وجودة على الحياة
هو كدة كدة هيموت بس بيتألم
بيتمني الموت في كل لحظه وبيتمني ينتحر لو يقدر يقوم ينتحر من شدة ألمه
المنبوذ اجتماعيا
في الفتره الأخيرة انتحرت شابة مثلية
اختلفت معاها الناس بين متعاطف معاها ومعارض وبيكفرها
عارف انك تعيش بدون هوية لا عارف نفسك ولد ولا بنت
وضيف على كدة نبذك لنفسك سواء كنت بنت بس انت كل حاجه فيك ولد ورافض لجسمك ولنوعك أو العكس ولد بس انت من جواك بنت وعايز تعمل المستحيل علشان تقلب للنوع الي انت حاسس بية بس المجتمع كله رافضك ورافض وجودك وبيهاجمك بأي مسمي سواء ديني أو مجتمعي
هو مش بمزاجه يكون ملحد هو بيشوف الالحاد دة حرية وبيعاند الكل علشان يحس أنه حر يحس بأنثويته أو بذكوريتها
وبعد معاناه من أذي نفسي رهيب وكمان اذي جسمي الي هو رافض جسمه وشكل جسمه وشكله في المرٱة ونظره الناس لية واحتقارة وقد يصل لسبة لمخالفته لقيم المجتمع
كل الألم دة بيخلية ينتحر
كل الناس الي ذكرتها دي نموذج بسيط لآلاف بينتحرة
الناس دول مرضي نفسيين وتفكيرهم مضطرب
هو مش بيفكر زيك وبيحسب الأمور زيك
هو معندهوش سبب يخليه على قيد الحياة
هو معندهوش حاجات بيحبها تخليه يفكر مليون مرة
هو معندهوش أسرة يخاف على نظرة الحزن بعد ما يفارقهم
معندوش اي حاجه هو فشل في كل حاجه
علشان كدة ضروري جدا الذهاب لأخصائي أو طبيب نفسي
مش لازم نوصل المريض لاقصي مراحل المرض ونقول يا كافر يا ملحد في جهنم
وتفضل تنبذه وتكرهه في نفسه اكتر ما هو كارهها اصلا
ياجماعة المريض النفسي هو مشروع تحت الانشاء لمنتحر
حافظ على اخوك او صديقك او صديقتك أو ابنك او بنتك او زوجك او زوجتك انك متسبهوش لغاية ما يختفي من وسطينا وبعدين نبكي
وفر دموعك وخليه يتعالج دة مرض والمريض معزور هو مش في تفكيرة السليم
تأليف
محمد أحمد عبد الرحمن
اخصائي نفسي اكلينيكي
#فريق ABC
ليست هناك تعليقات:
إرسال تعليق